Kalibo Aklan ——-Kaabuan sa mga negosyante sa Isla it Boracay ro nagaduha-duha pa nga mag bukas it operasyon eabi eon ro mga hotel ag resort matapos nga ginpaidaeum sa Modified General Community Quarantine (GCQ) ro probinsiya it Aklan.
Suno kay P/Lt. Col. Jonathan Pablito, hepe it Malay Police Station nga gusto it mga negosyante nga makasigurado nga indi eon makaangkon it coronavirus disease (COVID-19) infection sa Isla.
Ginpahayag dugang nga maskin magbukas man sanda makaron hay siguradong mahina man ro negosyo bangud nga puro mga residente pa eamang it Boracay ro ginapasugtan nga magpaligos sa baybayon .
Ro tanan nga mga accommodation establishments hay kinahangean nga may Certificate of Authority to Operate halin sa Department of Tourism (DOT) ag Mayor’s Permit antes nga pasugtan nga makapag operate .
Mag-eowas kara, dapat nga makaangkon sa gihapon it pre-booking ro mga turista kapareho it patakaran sa uman nga pagbukas it isla pagkatapos it an-um nga buean kato nga boracay closure .
Sa idaeum it new normal agud nga malikawan ro pagkalhit it COVID-19, hugut nga ginapatuman sa Isla ro pagsuksok it face mask ag pagpatuman it social distancing .
Bangud nga ginapasugtan eon ro dine in sa mga restaurants, required ro mga kaean-an nga makaangkon it “one entry one exit policy” agud nga malikawan ro pagdueutdutan kamana man nga 50 porsiyento eamang it capacity ro ginapasugtan agud nga makaangkon it haeuga nga dining area .
Nasayuran nga sangka medical frontliner nga nagtambong sa sangka komperensiya sa Metro Manila ko buean it Marso ro naga-isaeahanon nga nagpositibo sa COVID-19 sa Boracay.
Mabahoe sigon ro andang pagpasaeamat bangud sa kaabuon it mga Chinese tourists nga ro iba hay naghalin sa Wuhan City, epicenter it sakit, hay owa it natamaan it makamaeatay nga sakit sa Isla.
