KALIBO, Aklan—Nagapabilin nga maeanghay ro negosyo it mga nagkaeain-eain nga restaurant ag establisyimento sa palibot it Kalibo International Airport.
Raya hay kasunod it sangkiri eamang nga mga flights ro nagahugpa sa nasambit nga paeoparan.
Angot kara, panawagan it negosyante nga si Anna Marie Dela Peña nga kunta hay balansehon ro tanan eabi eon makaron nga maabo gihapon ro andang losses halin pa ko tyempo it pandemya.
Panawagan nanda sa lokal nga gobyerno it Kalibo nga buligan sanda nga makarekober agud nga maka-cope-up sa anda nga taxes renewal.
Dapat suno kana nga taw-an man it maskin hasta eang sa 15 flights kada adlaw ro Kalibo airport bangud nga sa mga pasahero mapa-local ag international tourist nabubuhi ro andang negosyo.
Inde suno kana tanan itumpok idto sa may bahin it Caticlan, Malay bangud nga nagakinahang-ean man sanda nga mga negosyante iya sa Kalibo Airport.
Nasayuran nga haeos nagaabot sa 35 domestic flights sa sueod it sang adlaw ro nagahugpa sa Caticlan Airport ag ko ulihi ngara hay may naghugpa eon idto nga international flight maghalin sa Tapei, Taiwan.
