Kalibo Aklan —— Nagakabaeaka eon ro mga Overseas Filipino Workers (OFW’s) sa andang sitwasyon makaron sa Dubai, UAE.
Raya hay matapos nga ginpaeawig pa it gobyerno ro naga-iral nga lockdown tuga it 2019 coronavirus disease (COVID-19) pandemic.
Suno kay Bombo International Correspondent Jeffrey Fuentes, halin kat naglockdown ro lugar hay uwa eon man sanda it trabaho kon sa siin may polisiya nga “no work, no pay” rason nga uwa sanda makaron it kita.
Posible nga gutom ro andang abuton bangud nga uwa man it ayuda ro gobyerno nga ginata-o kanda nga mga OFW’s.
Maskin ro kompanya sigon hay nagsarado eon man tuga it COVID-19.
Suno pa kay Fuentes, limitado ro hueag it mga tawo bangud nga tig sambilog eamang sa tagsa ka baeay ro ginapasugtan nga magguwa agud nga magbakae it pagkaon.
Mag-eowas kara hay uwa eon it pwede nga magguwa mas kapin pa pag-abot it alas-8:00 it gabi-e.
Ginpahayag dugang ni Fuentes nga strikto ro gobyerno sa pagpatuman it andang mga polisiya rason nga uwa it choice ro mga tawo kundi magsunod bangud nga may kaakibat nga penalidad ro magasuway kara.
Limitado sigon magpaguwa it balita ro gobyerno ag base sa anda nga impormasyon, ro mga nagpositibo sa COVID-19 hay mga Bangladeshi ag Pakistani.
Suno pa kay Fuentes, maskin uwa it nagatumpukan nga pulis, military, ag traffic enforcer hay uwa ka man it makit-an nga mga violators bangud haeos tanan nga mga tawo hay nahadlok sa ginapairal nga polisiya it gobyerno.
Sa makaron ro UAE hay nakalista eon it 1,799 nga kaso it COVID-19 ag sa nasambitang numero, napueo kara ro namatay ag 144 ro nakarecover.
