KALIBO, Aklan—Temporaryong ginabawaean it andang mga employer nga makaguwa ro mga Overseas Filipino Worker ukon OFW’s nga una nga makarun sa nasyon nga Hong Kong.
Suno kay Bombo International Correspondent Mary Lou Bautista Borra it Hong Kong nga sa makarun hay padayun ro paglobo it andang mga nailistang kaso it coronavirus disease ukon covid-19 rason nga uman nga ginlimitahan ro andang paghueag.
Kaabuan man sigon sa mga nagapositibo hay bangud sa na-detect nga omicron variant it covid-19.
Sa pihak kara, owa man sigon it iba pang mga pinagbag-o sa andang mga soeundanan mag-euwas eamang sa limitadong paghueag ag ro paglimita sa daywang katawo eamang kung nagatipon ukon magdine-in sa mga restaurant.
Nasayuran nga sambilog sa mga ginapanan-aw nga rason it pagtinaas it kaso it covid-19 sa nasambitan nga nasyon hay ro paghaeuga it andang mga protocol ko mga nagtaliwan nga pilang dominggo.
