KALIBO, Aklan—Nagakabaeaka makaron ro mga Overseas Filipino Worker (OFW) sa Ukraine bangud sa nagapadayun nga tensiyon sa tunga it Russia.
Suno kay Bombo International Correspondent Jeni Lopez nga amat-amat eon nga nagabakwit paadto sa mas eowas nga lugar ro mga pumueoyo nga naka-istar maeapit sa border.
Sigidas man sigon ro pakikipag-angot it embahada it Pilipinas nga nakabase sa Polad sa sitwasyon it mga Pinoy.
Sa kamatuoran suno kana hay nagpaabot eon it bulig-pinansyal ro taeatapan sa pilang OFW para sa insigidang pagbakwit sa mga apartment kamana man nga mapadali ro paghueag engkaso nga kinahang-eanon nga magpatuman it repatriation.
Sa pihak kara, nagapabilin man nga kalmado ro gobyerno it Ukraine kung siin owa raya it ginapatuman nga anuman nga pag-instrikto.
Matueopangdan nga ginkaakig it Russia ro plano it Ukraine nga makipag-alyansa sa North Atlantic Treaty Organization (NATO) rason nga nagbutang raya it masobra 100,000 nga soldado sa border it daywang ka mga nasyon.