Kalibo Aklan—–Ginklaru it Provincial Health Office (PHO- Aklan) nga ro tanan nga mga magabalik nga Overseas Filipino Workers (OFW’s) hay magapaidaeum sa rapid testing para sa coronavirus disease (COVID-19) sa tuyo nga matapna it gobyerno ro imported cases.
Suno kay Dr Cornelio Cuatchon Jr., it PHO-Aklan nga ro tanan nga mga naga-abot nga OFW, mapa land-based ukon sea-based hay required nga magpaidaeum sa mandatory 14-day quarantine ag subject sa rapid antibody testing para sa COVID-19.
Ro nasambit sigon nga tikang hay aprubado it Inter-Agency Task Force on Emerging Infectious Diseases (IATF-EID).
Samtang, ginprayoridad sigon it PHO nga mabuligan ro mga stranded nga mga workers sa Isla it Boracay nga natigayon eon nga maka-uli sa andang natungdan nga mga banwa.
Nagapati si Dr. Cuatchon nga uman magabalik sa General Community Quarantine ro Aklan, apang nakadepende sigon ro pagdesisyon sa IATF-National.
Ginpasaeamatan man nana ro mga pumueuyu bangud sa hugut nga pagsunod sa protocols rason nga sa nagtaliwan nga masobra sa daywang domingo hay owa eon it nailistang kaso it COVID-19 sa Aklan .
Sa pihak nga parte, ginahueat makaron ro confirmatory result it sangka COVID patient nga padayun nga naka-isolate sa Provincial Hospital kaibahan ro ap-at nga nag-negatibo eon sa virus matapos nga uman nga ginpaidaeum sanda sa repeat test kahapon nga adlaw.
