KALIBO, Aklan—Posibleng magapangatubang sa kriminal nga kasong malversation of public funds ro sangka barangay kapitan kon ro pondo it banwa hay anang gingastos para sa anang kaugalingon ukon gin-divert para sa ibang proyekto nga ginatawag nga technical malversation.
Suno kay Atty. Plaridel Morania, sangka batikang abogado sa aklan nga may mabahoe nga saeabton ro sangka opisyal nga naga-abuso sa public fund.
Dapat suno kana nga magpa-blotter ro barangay council sa police station agud nga makaangkon it record ag pagkatapos hay pwedeng ipasaka ro reklamo sa prosecutors office kaibahan ro mga testigo.
Engkasong makitaan it probable cause, pwede kara nga maduso ro kaso nga may penalidad nga hasta sa reclusion perpetua.
Mag-eowas kara, pwede man suno kay Atty. Morania nga pasakaan it kasong administratibo it konseho ro andang punong barangay nga may kaparehong pag-eabag sa Department of the Interior and Local Government ukon DILG bangud nga sanda ro may disciplinary authority nga magdesisyon sa kaso partikular eon ro pagpatalsik kana sa pwesto.
Posible man sigon nga ipasaka it DILG ro kaso sa Office of the Ombudsman, apang ro posisyon sa barangay level hay owa nagakabagay nga ipaabot gid sa nasambit nga taeatapan.
Sa pihak nga parte, ginsuhestiyon man ni Atty. Morania nga makaangkon anay it komprontasyon ro konseho sa andang kapitan ag engkaso nga ibalik kara it bilog ro kwarta hay pwedeng indi eon raya paghingabuton ukon pasakaan it kaso.
