KALIBO, Aklan—Nagpatigayun it sangka programa ro mga opisyales it Barangay Poblacion, Kalibo kaibahan ro iba pang ahensya it gobyerno para mabuligan ro mga katutubong Ati nga makabalik sa andang lugar.
Raya hay kasunod it gulpiyadang pag-abu it mga Ati sa mga nagapangaunang daeanon, pampublikong lugar ag establisyemento sa Kalibo.
Suno kay Punong barangay it Niel Candelario it nasambit nga lugar, insigida imaw nga nakipag-coordinate sa pamunuan it Kalibo Municipal Police Station ag Municipal Social Welfare and Development Office (MSWDO) para mataw-an raya it nagakaigo nga igtueopangod ag solusyon.
Ginkumpima man kara nga nakabaton sanda it pilang ka mga report nga may gina-alergar nga naga-singhot it ginadumilian nga substance partikular ro “rugby”.
Ginakabaeak-an sigon nanda ro posibleng maeain nga epekto kara sa mga nagagamit nga indibidwal kamana man nga tuyo nandang proteksyonan ro iba pang pumueoyo.
Suno kay Candelario, gin-imbitahan nanda ro mga katutubong Ati nga magsakay sa patrol it barangay ag pulisya kung siin gindaea ro mga raya sa covered court it Kalibo Pastrana Park kamana man nga gin-profiling.
Kaeabanan sa mga raya hay maghalin sa siyudad it Iloilo ag Roxas.
Ginklaro it opisyal nga ro andang ginhimo nga aksyon hay bukon it diskriminasyon sa mga natungdan nga indibidwal kundi para eamang sa kamaeayran it tanan.
Ginpakamayad sigon nanda nga paulion eon lang ro mga raya sa tagsa nanda ka mga lugar.
