KALIBO, Aklan—Hugot nga ginkadismaya it Barangay council sa Barangay Jawili, Tangalan ro andang nadiskubrehan nga tambak-tambak nga mga basura nga ginpangkalhit it mga nagadayo sa andang lugar.
Suno kay Barangay Kapitan James Tumbagahan nga owa sanda nagaekspektar sa andang nasaksihan nga mga kalhit matapos ro ginhimo karang pagpanglimpyo.
Apisar sigon nga nagapanglimpyo ro mga barangay council hay padayun man nga nagakalhit it andang mga basura ro mga nagabisita sa andang lugar.
Nasayuran nga pila eamang sa andang nakit-an nga kalhit hay ro mga underwear nga ginsab-it pa sa mga puno it kahoy , nagkaeain eain nga klase ag color it condom, napkin , plastic ag mga putos it pagkaon.
Samtang, nagapati man si Kapitan Tumbagahan nga may una pa nga nagahimo it kababalaghan sa andang lugar bangud nga medyo tago raya ag owa haeos it panimaeay.
Samtang, nag-apela man imaw sa mga gustong magpadueong sa andang barangay mas kapin sa mga riders ag couple nga maging responsable sa andang basura kamana man nga indi maghimo it kamaeamaeahan.
