KALIBO, Aklan—Mas pang ginpabaskog it barangay council it Poblacion, Kalibo ro andang monitoring agud nga malikawan ro mass gatherings nga posibleng paga-ugatan it pagkalhit it COVID-19 sa atubang it paeag it Omicron variant.
Raya hay may kaangtanan sa selebrasyon it kapiestahan ni Sr. Sto. Niño de Kalibo.
Angot kara, nag apela si Punong barangay Niel Candelario it Poblacion, Kalibo nga limitahan anay ro pagbaton it mga bisita sa kada baeay nga bukon it miyembro it pamilya.
Bukon suno kana it bawae ro handaan , apang banned ro inuman sa guwa it baeay ukon public drinking.
Sangkiri nga pagtiis anay suno kana hasta nga matapos ro pandemya.
Ro barangay Poblacion it Kalibo hay nakalista makaron it kabilugan nga 34 nga aktibong kaso it COVID-19.
