KALIBO, Aklan—Nag-umpisa eon nga mapuno ro mga ospital sa probinsiya it Aklan kadungan it padayon nga pagtaas it kaso it COVID 19.
Suno kay Dr. Cornelio Cuatchon it Provincial Health Office ukon PHO-Aklan nga una eon sa kritikal nga lebel ro mga ospital bangud nga haeos owa eon it bakante ro mga ICU ag COVID ward.
Mag-eowas kara, nakalista man makaron ro Aklan it mataas nga average daily attack rate ukon ADAR kun sa siin raya hay base sa numero it mga bag-ong kasong nailista sa sueod it daywang dominggo sa per 100,000 population ag positivity rate nga 40 to 50%.
Ro positivity rate suno kana raya hay ro percentage it mga tawo nga nagpositibo sa sakit sa kabilugan nga ginpaidaeum sa RT-PCR testing.
Ginpahayag pa ni Dr. Cuatchon nga nagapabilin nga una sa high risk ro Aklan bangud sa mataas nga ADAR, ICU utilization ag positivity rates.
Nagpanawagan man ro PHO nga pabaskugon pa it kada local government units ro prevention, detection, isolation, treatment and reintegration nga istratehiya agud nga matapna ro impeksyon ag taeapnan it COVID-19.
