KALIBO, Aklan — Milyon-milyong piso ro kahalitan nga gintuga it mga mabaskog nga pag-uean daea it Southwest Monsoon ukon Habagat ag mga bagyong Crising, Dante, ag Emong sa pampublikong imprastruktura sa probinsiya it Aklan .
Raya hay base sa summary of calamity damaged infrastructure report it Department of Public Works and Highways ukon DPWH-Aklan.
Kaibahan sa nailistang partially damaged structure hay ro pilang section it karsadahon sa Brgy. Tambak, New Washington nga magakinahangean it kapin sa P2.5 milyon para sa reconstruction .
Samtang, eubusan pa nga nahugos ro daywang flood control structures sa Brgy. Jumarap, Banga matapos nga tumama ro bagyong Verbena nga nagakinahangean it kapin sa P9 milyon ag P7.8 milyon para sa rehabilitasyon.
Sa pihak nga parte, sa pagpanaeasa it bagyong Opong, mag-eowas sa nag-eapad nga damaged it revetment wall sa Brgy. Jumarap hay nasamad man ro parte it flood control structure sa Brgy. San Jose Ibajay nga nagakinahangean it kapin sa P82 milyon para sa reconstruction.
Angot kara, ginpasiguro ni Engr. Joey Ureta, head it maintenance section it DPWH-Aklan nga kada may nagatama nga kalamidad nga nagtuga it kasamaran sa mga imprastraktura hay insigida nanda raya nga gina-obrahan it report ag ginasumite sa regional office agud mapondohan.
Gindugang pa nana nga ginahueat eon lang nanda ro pag-abot it sangka equipment halin sa regional office agud nga makapatigayon it re-channelling sa Brgy. Jumarap, Banga sa nag-collapse nga revetment wall agud nga maprotektahan ro mga kabaeayan ag pangabuhian it mga apektadong residente.
