KALIBO, Aklan—Ginklaro it lokal nga gobyerno it Aklan nga indi pa gihapon pwedeng makagguwa ro mga pamatan-on nga naga-edad 18-anyos panaba apisar nga ginapasugtan eon it National Inter-Agency Task Force nga makagguwa it panimaeay ro mga unga nga limang dag-on pataas sa mga lugar nga una sa idaeom it Modified General Community Quarantine (MGCQ) ag General Community Quarantine (GCQ).
Suno kay Provincial Administrator Atty. Selwyn Ibarreta nga nagapabilin gihapon nga mataas ro kaso it Coronavirus Disease 2019 ukon COVID-19 sa probinsya it Aklan kamana man nga una gihapon kita sa idaeom it high risk classification.
Mag-eowas kara, mataas man ro average daily attact rate ag utilization it hospital beds.
Nauna eon nga nagpaandam ro gobyerno probinsyal nga posibleng ibutang it national government sa mas hugut nga quarantine classification ukon Modified Enhanced Community Quarantine (MECQ) ro Aklan engkaso nga indi gihapon magnaba ro nailistang kaso it deadly virus sa pagtapos it Hulyo.
Sa oras nga raya hay maipatuman, maabo nga mga negosyo ro magasarado ag uman nga iga-balik ro pag-require it quarantine pass.
Agud nga malikawan ro padayun nga pagtinaas it kaso, nag-apela ro Provincial IATF sa publiko nga makipagbueoligan ag hugut nga magsunod sa minimum health protocols kontra sa COVID-19.
