Kalibo Aklan ———–Nagpatuman eun it 100 % nga seating capacity ro tanan nga mga pampasaherong saeakyan nga nagabiyahae it Malinao-Lezo vice versa umpisa kahapon nga adlaw, petsa 1 it Marso kasunod it pagpatuman sa Alert Level 1 sa bilog nga probinsya it Aklan.
Suno kay Mr. Edgar Igcasenza , presidente it Malinao-Lezo Transport Group nga sa makarun hay nagapabilin sa gihapon ro andang pagsinueoktan it pamasahe.
Raya hay bangud umpisa pa sigon ko buean it Pebrero kun sa siin 70% pa eamang it andang kapasidad ro ginpasugtan, ginbalik eun nanda sa regular ro pagsinueoktan it pamasahe sa andang rota.
Samtang, ginpahayag man kara sa publiko nga kung may driver nga nagapanukot it sobra sa gintaeana nga pamasahe hay ipaabot kana agud nga mataw-an it nagakaigo nga penalidad.
Nagpasaeamat man raya sa mga driver ag operator nga nagasunod sa andang hingyo nga indi anay maghueagon ro presyo it pamasahe agud nga indi malisdan ro publiko.
Sa pihak nga parte, agud nga masiguro sa gihapon nga indi magtaeapnan it covid virus sa pampublikong transportasyon hay obligado sigon ro mga pasahero nga magsuksok it face mask samtang ginabawaean man ro pagkaon sa sueod it saeakyan sa oras it pagbiyahe.
