KALIBO, Aklan—Ginklaro it Civil Aviation Authority of the Philippines (CAAP)-Aklan nga ro outbound passenger ukon mga pasahero eamang halin sa probinsya it Aklan paadto it Manila ro andang ginapasugtan nga magbiyahe sa Kalibo International Airport.
Raya hay matapos nga pasugtan it Inter-Agency Task Force ro hinyu it mga Local Chief Executive sa Western Visayas nga suspendihon ro pagbiyahe it mga pasahero halin sa National Capital Region (NCR) ag kaeapit nga mga probinsya it Bulacan, Cavite, Laguna ag Rizal.
Tuyo sigon kara nga malikawan ro pag-abo it kaso it deadly virus sa rehiyon.
Suno kay CAAP-Aklan manager Engr. Eusebio Monserate Jr. nga mabahoe ro naging epekto it nasambit nga mandato sa operasyon it paeuparan.
Suno kana, ginpaathag sigon it pilang ka mga airline companies nga mabahoe ro posibilidad nga malugi sanda bangud sa sangkiri nga numero it outbound nga pasahero.
Pila sigon ka mga airline companies ro nagpabutyag man it kanselasyon sa andang biyahe paadto it probinsya it Aklan kaibahan eon kara ro Philippine Airlines ag Cebu Pacific.
