KALIBO, Aklan — Ginpasiguro it Department of Tourism (DOT) nga hugut nanda nga ginapatuman ro pagbawae sa cruise ships sa isla it Boracay nga nag-umpisa ko Abril 16 hasta Mayo 16.
Tuyo it pag-ban it cruise ships sa nasambit nga mga petsa hay agud nga mabantayan ro carrying capacity sa isla bangud sa pagbuhos it mga turista makaron nga Semana Santa ag summer season .
Nasayuran nga ro carrying capacity it isla hay hasta eamang sa 19,215 kada adlaw eakip ro 6,405 tourist arrivals per day.
Samtang, hugut man nga ginabantayan makaron it Boracay Inter-Agency Rehabilitation Management Group ro mga gintaeana nga patakaran ag ordinansa partikular makaron nga Kuwaresma.
Angot kara, uman nga ginpadumdum it DOT sa publiko nga likawan nga mag-post ukon mag-share it mga lumang videos ag litrato it cruise ships sa Boracay nga matsa ginapakita nga bag-ong hitabu bangud nga posible raya nga magatuga it pagtaeang ag alarma .
Sa pihak nga parte, ro iba pang “close out dates” para sa cruise ships nga gintaeana makaron nga dag-on hay sa Oktubre 26 hasta sa Nobyembre 8 para sa pagdumdum it All Saints Day ag All Souls Day; kamana man sa November 23 hasta January 5, 2020 para sa pagpatigayon it Southeast Asian ukon SEA Games ag ro pagdumdum it paskwa ag bag-ong dag-on .
