Kumpara sa mga nagtaliwan nga eleksyon, ginaeauman nga mas maabu nga mga Pinoy sa abroad ro makaboto makaron nga eleksyon 2022.
Sa Hong Kong, kapin sa 30% it mga Pilipino ro nagboto eon samtang ro ibang mga nasyon hay nag-report it 20%, umpisa ko Abril 10, ro unang adlaw it pagboto sa ibang nasyon.
Sa makaron , para sa early time period of voting, naabot eon ro target nga masobra sa 30 percent.
Nasayuran nga sa mga nagtaliwan nga eleksyon, kapin sa 20% ukon mas sangkiri eamang ro naging overseas voter turnout.
Base sa datos it Commission on Elections (Comelec), may una nga 1,697,215 overseas Filipinos ro nakarehistro para sa 2022 elections.
Sa nasambit nga numero, 786,997 hay halin sa Middle East ag African countries, 450,282 halin sa Asia Pacific, 306,445 halin sa North ag Latin America, ag 153,491 halin sa Europe.
Makabig nga nakabulig ro bag-ong concept it poll body nga “vote anywhere” ag field voting.
Sa “vote anywhere” concept, puwedeng magboto ro Pinoy sa ibang nasyon maskin nga owa imaw idtu nakaparehistro.
Samtang, sa field voting, paga-agtunan it consul ukon embassy staff ro Pinoy para makaboto.
Pwedeng magboto ro mga Pinoy sa abroad hasta sa mismong adlaw it eleksyon sa Pilipinas sa Mayo 9, 2022.
Puwede sanda nga magboto sa posisyon it presidente, bise presidente, 12 senador ag sangka partylist group.
Manami nga mas maabu ro nagakumpiyansa sa eleksyon rason nga dahanan naton ro andang boto.
Maskin nga maeayo sanda, nasayuran naton nga pirme sanda nga nagabuylog sa paghandum nga maging mas maumwad ro Pilipinas ag pirmeng nagaeaum nga pinaagi sa pagpili it mga nagakabagay nga lider ag representante it banwa raya hay matabu.
