KALIBO, Aklan—Dismayado ro maabu nga Pilipino sa pagkapierde it Gilas Pilipinas sa koponan it Cambodia sa nagapadayun nga 32nd Southeast Asian Games sa Phnom Penh.
Suno kay Bombo International Correspondent Vernon Moises nga owa naitago it mga Pinoy fans ro pagkadismaya nga nag abang sa hampang ro kapierdihan it Gilas.
Pila suno kana sa mga ginapanan-aw nga posibleng rason hay ro pag angkon it maabu nga mga naturalized player it Cambodia ag ro court nga ginahampangan nga nauna eon nga ginreklamo it players it Gilas nga madanlog ag mainit.
Samtang, nagapati man si Bombo International Correspondent Juan Miguel Cansino nga na-outplay it Cambodia ro Gilas Pilipinas.
Maskin suno kana ro Philippine team hay nabulaga sa performance it Cambodia.
Base pa sa anang obserbasyon nga bukon gid man it naging manami ro hampang kabi-i it Pilipinas.
Sa score nga 79-68, ginpasamit it Cambodian basketball team sa Gilas Pilipinas ro unang pagkapierde.
Bangud sa kapas-eawan, dumausdos ro Gilas Pilipinas sa second place it Group A it torneo sa record nga 1-1.
Nagapanguna ro host nga Cambodia nga may 2-0.
Ro Malaysia nga ginpierde it Pilipinas, nga may 1-1 nga kartada man.
Ro magapangunang daywang team sa kada grupo ro magasueod sa semifinal round.
Ginaeauman nga makabawi ro Pilipinas sa away kara sa Singapore sa Sabado.
Suno kay Cansino nga mabahoe nga upset ro nahimo it Cambodia nga world no. 157, matapos pierdihon ro Gilas Pilipinas nga no. 40 sa listahan it mga koponan sa kalibutan.
Sa pihak nga parte, ro kasubo hay gulping nabayluhan it kasadya matapos nga magdaog ro womens volleyball kontra sa Singapore eabi pa ag nakita sa aksyon ro star player ag nagatindog nga team captain nga si Allyssa Valdez.
