May panibag-on eon man nga dugang nga presyo sa petrolyo makaron nga adlaw it martes.
Base sa nailistang oil trading it sangka giant oil industry ko May 30 hasta June 3, naga-abot sa P6.30 hasta P6.60 ro dugang sa presyo sa kada litro it diesel.
Samtang ro presyo sa gasolina hay nagtaas eon man it P2.50 hasta P2.80 kada litro.
Suno sa natungdan, may tatlong rason nga naka-apekto sa pagtaas it presyo.
Una, umpisa it paglobo it demand para sa mga nasyon sa parte it Northern hemisphere tuga it summer peak period umpisa June hasta September.
Ikaywa , ro Russian oil ban it European Union.
Ikatlo, ro paghaeuga sa lockdown sa China nga imaw ro rason it paglobo eon man it demand sa langis.
Kun ro mga raya ro matuod nga rason it owa it pundo nga pagtaas sa presyo it petrolyo, medyu owa gid man it mahimo kundi nga magpiyong it mata ag batunon ro sitwasyon.
Sa pihak kara, nagaeaum kita sa atong gobyerno ebi eon sa bag-ong administrasyon nga matabangan ro mga grabe ag direktang naaapektuhan it oil price hike.
Kabay nga may alternatibong pamaagi kon paalin nga makadungan sa makarondaya nga problema.
Sa bulig it mga mayad nga miyembro it economic team, nagaeaum kita nga masarangan naton nga maging mas mabakod ag magapadayun sa pagbangon.
