KALIBO, Aklan—Padayon nga nabatyagan it mga Pinoy sa Israel partikular sa Petah Tikva Center sa Tel Aviv ro mga pagsabog nga tuga it airstrike sa nagapadayon gihapon nga tensyon sa tunga it Palestine ag Israel.
Suno kay Bombo International Correspondent Melly Jean Novilla, tubong banwa it Libacao apang presenteng naga-istar sa nasambit nga nasyon, maikumpara sigon sa bag-ong dag-on ro mga eopok nga andang nababatian kon sa siin matsa una eamang raya sa andang ugsaran.
Ginpahayag dugang nga bukon eon kanda it bag-o ro nasambit nga sitwasyon apang mas grabe sigon makaron ro natabo ag raya ro pinakamabuhay nga kinagamo nga natabo sa Israel.
Antes sigon ro pagtama it mga rockets hay may mga patimaan eon raya pinaagi sa mga alarm kon sa siin makit-an eagi nanda kon siin matama ro mga ginapaeopad nga rockets.
Suno pa kay Novilla, pangamuyo eamang ro andang panaming agud nga inde matamaan it mga pagsabog partikular ro edipisyo kon sa siin sanda naga-istar.
Base sa andang gobyerno, uwa it mga pinoy nga naninahan ukon namatay partikular sa Gaza.
