Nagtapos eon ro adlaw para sa pag-umpisa it panibag-ong an-um nga dag-on nga pagdumaea.
Matapos ro mga banggi-anay, sa wakas, nakapili eon ro publiko.
Ro makolor ag masangag nga kampanya hay nagtapos sa malinong ag maayos nga pagboto sa pihak nga may pilang lugar sa nasyon nga nakaangkon it kinagamo nga may kaangtanan sa eleksyon.
Ginahinyu naton sa tanan nga mga botante, kandidato ag partido, maging matawhay makaron nga nagwakas eon ro away pinaagi sa balota.
Likawan naton ro gulo nga posibleng maging rason it pagka-watak-watak it mga Pilipino.
Indi maitago nga naging mainit ro engkwentru makaron nga eleksyon eabi eon sa pagka-pangueo.
Ro indi mapugngan nga pagkawatak-watak hay uman nga natabu.
Apang ko lunes ro boses it kaabuan ro naghugpong sa tanan.
Pagkatapos it paghueuyapan , ro magkaibang kolor hay kabay nga magatingob eon ag maghueag para sa kamaeayran it tanan.
Kun paalin naton nga ginpanindugan ro atong mga kandidato, makarondaya man kunta naton igapakigsukoe ro desisyon it kaabuan.
Kada eleksyon hay panibag-ong kahigayunan agud nga mas pang mapamayad ro atong nasyon.
Nagboto kita agud nga makapili it mga nagakabagay nga magapabilin ukon bag-ong magapungko nga atong makabulig sa tanan nga mga nagakatabu sa nasyon.
Nagtapos eon ro pinaka-importanteng desisyon.
Magkasaea ukon maghinoesoe man kita sa atong mga ginboto, bilang pumueuyu pirmeng nakadepende katon ro gahum eabi eon kon nagatingob.
Sa uman kinahangean nga mag move on daog man ukon pierde basta ro importante magkayod kita para sa atong kamaeayran.
