Kalibo Aklan ——-Na-trauma ro pilang mga Pinoy nga maeapit eamang sa lugar kun sa siin natabu ro mabaskog nga pagsabog sa Beirut, Lebanon.
Suno kay Bombo International Correspondent Donavil Gaborno, residente it Brgy. Old Buswang, Kalibo ag presenteng nagattrabaho bilang domestic helper sa Beirut nga pageaum nana ag ko anang amo nga mabaskog eamang nga linog ro umuyog sa andang lugar matapos nga magkaeatumba ro mga gamit nanda sa bilog nga baeay ag naghueag ro andang mga bintana.
Apang pagguwa nanda sa andang balcony hay nakita nanda ro mabahoe nga kaeayo nga nagapaibabaw sa parte it pantalan it Beirut.
Kitang-kita sigon nanda ro kaeayo bangud nga nahamtang sanda sa 8th floor it building nga gina-istaran .
Gindugang pa ni Gaborno nga indi nana makalipatan ro naging experiensiya , kun sa siin, hasta sa makaron hay haeos indi imaw makatueog bangud sa kahadlok nga nabatyagan .
Bangud sa natabu, nabatyagan man sigon nana ro malasakit it anang babaying amo matapos nga idtu imaw ginpatueog sa anang kwarto agud nga maduea ro anang kahadlok .
Samtang , emosyunal nga nagpasaeamat si Donavil bangud nga owa it maeain nga natabu kana .
Ginduea man nana ro pagkabaeaka it anang pamilya iya sa Aklan .
Ginasugid nga bangud sa ginpabay-an nga nakatambak nga 2,750 tons it ammonium nitrate nga an-um nga dag-on eon nga nakatago sa bodega ro rason it natabu nga insidente.
Sa makaron hay nagapadayun sigon ro imbestigasyon it gobyerno kon ginhungod ukon aksidente ro natabu .
