KALIBO, Aklan—Haum eon ro mga pinoy sa guam sa pagpanaeasa it bagyong Mawar sa nasambit nga US territory.
Suno kay Bombo International Correspondent Jonathan Ignisaban it Guam nga kaibahan sa andang preparasyon hay ro pagbutang it abang sa mga bintana it andang baeay ag iba pang mga bagay nga posibleng apukon it mabaskog nga hangin.
Gin engganyo man sigon it mga otoridad ro mga tawo nga mag-tipon it makaon, ilimnon, bueong ag first aid supplies.
Sa makaron suno kana hay haeos kongkreto eon ro tanan nga mga baeay sa Guam agud nga malikawan ro pagsamad kon may maga-agi nga bagyo.
Samtang, ginputoe eon ro linya it kuryente sa lugar ag sarado eon ro haeos tanan nga mga establisimento komersiyal ag mga taeatapan.
Ro bagyong Mawar nga ginakabig eon makaron nga super typhoon hay ginaeauman nga magasueod man sa Philippine Area of Responsibility sa masunod nga mga inadlaw.
Sa impormasyon, ulihing nasip-eatan ro bagyong mawar 500 kilometro halin sa Hagatna, kabisera it isla kun sa siin may una raya nga 170,000 residente, suno sa US Joint Typhoon Warning Center.
Ginpahayag dugang ni ignisaban nga medyu mabuhay eon nga tiempo nga may tumama nga mabaskog nga bagyo sa lugar kun sa siin maabu kato nga panimaeay nga himo sa kahoy ro naguba.
Pila sa mga abiso kanda it otoridad hay maging kalmado, mag monitor ukon magbantay it balita ag maging haum.
Sa pihak kara, owa pa man sigon sanda nakabaton it evacuation order.
Maabu eon man nga flight pasueod ag paguwa it Guam ro kanselado bangud sa bagyo.
