KALIBO, Aklan–Nagapabilin nga eowas ro mga pinoy sa Haiti sa pihak it maeapnagon nga kinagamo ag pagpaeagiw it pilang libong mga peligrosong inmates sa pinakamabahoe nga prison facility sa nasambit nga nasyon.
Suno kay Bombo International Correspondent Fatima Irodistan Sylvain it Haiti nga napilitan ro gobyerno nga magdeklara it state of emergency bangud sa mga kinagamo sa kabisera it nasyon nga nagresulta sa pagkasamad it linya it komunikasyon ag daywang prison breaks.
Ginaduso suno kana it mga lider it nagapangunang gang nga mapatalsik eon sa pwesto si Prime Minister Ariel Henry.
Bangud sa mga insidente it pagpamaril, pilang baeay ag opisina it mga pinoy ro tinamaan it bala.
Maskin suno kana ro waiting area it airport kun sa siin may pilang mga filipino idtu nga nakataeana nga iga-repatriate hay tinamaan man it mga nagtaeang nga bala.
Gin-abisuhan sigon ro mga pinoy nga magdahan eabi eon sa pagsueod ag pag-uli sa trabaho bangud sa waea-tuo nga kinagamo sa nagkaeain-eain nga lugar sa Port-Au-Prince.
Nasayuran nga ro numero it mga pinoy sa Haiti hay owa eon naka-abot makaron sa 100.
Dugang pa ni Sylvain nga haeos bilog nga nasyon hay bukon it eowas bangud nga ginadumaeahan raya it mga gangs rason nga maeapnagon ro kidnapping, hold-up ag iba pang krimen.
Nauna eon nga nagpa-abiso suno kana ro US government nga aywan eon it andang mga citizen ro nasambit nga nasyon.
Kada dag-on man suno kana hay naga-offer ro Philippine government it repatriation sa mga pinoy nga gusto eon nga mag-uli.