KALIBO, Aklan—Sambilog si Bombo International Correspondent Cha Reyes it Virginia, USA sa mga pinoy sa ibang nasyon nga eubus nga ginakahidlawan ro selebrasyon it Paskwa sa Pilipinas eabi eon sa probinsiya it Aklan.
Suno kana nga bilang sagrado romano katoliko hay nakasanayan eon nana ro pagtambong it simbang gabi ukon Misa de Gallo, apang sa andang lugar suno kana hay owa kara nagapatigayon bangud sa manaba nga numero it mga nagasimba.
Kaeabanan suno kana sa mga pumueuyu sa US hay nagakatueog pa sa raya nga mga oras.
Kaabuan suno kana sa mga nagasimba idtu hay mga Filipino ukon Meksikano.
Samtang, nakakabatyag man sigon imaw it kasubo bangud nga indi nana makaibahan ro anang bilog nga pamilya sa selebrasyon it kapaskwahan eabi eon nga may covid 19 pandemic hay mabudlay pa para kanda nga makabakasyon.
Sa pihak nga parte, bangud nga nagtaas eon man ro spike it covid infection sa andang estado hay limitado sa 40 % it kapasidad ro ginapasugtan nga makasimba.
Instrikto man sigon nga ginapatuman makaron ro minimum health standard sa US partikular ro pagsuksok it face mask, pirmeng pagsanitize it mga alima ag physical distancing.
