KALIBO, Aklan—Maga-abang eon lang ro mga Pinoy sa japan sa andang mga telebisyon ag gadgets sa pormal nga pagbukas it Tokyo Olympics pasado alas-7:00 hindunang gabi-i oras sa Pilipinas.
Suno kay Bombo International Correspondent Johnny Sato Gallos nga bilang pagsunod sa protocols hay magiging limitado eamang sa mga flag bearers ag pilang sports officials ro tradisyunal nga opening parade sa sueod it Tokyo gymnasium.
Bangud nga sikat ro japan suno kana sa mga makolor ag bongga nga fireworks display hay posibleng makaangkon man kara sa opening hinduna.
Pagapamunuan nanday gymnast Carlos Yulo, golfer Yuka Saso ag weightlifter Hidilyn Diaz ro 16 pang Pinoy athletes nga magapuntirya sa kauna-unahang Olympic gold medal it Pilipinas.
Ginpahayag ni Gallos nga mag-eowas sa medalya hay ginasuk-ean man it mga Pinoy athletes ro COVID-19.
Nasayuran nga owa pa man naga-umpisa ro hinampang hay haeos 80 eon ro nagpositibo sa sakit sa sueod it Athletes’ Village.
Nagapabilin makaron ro state of emergency sa nasyon sa tuyo nga malikawan ro transmission it sakit samtang nagapadayun ro olimpiyada.
Nasayuran nga makaron nga adlaw hay gindeklarang holiday sa bilog nga nasyong Japan.
