KALIBO, Aklan—Ginapadahan makaron it Philippine Embassy sa Amman, Jordan ro mga Pinoy nga presenteng naga-istar ag nagatrabaho sa nasambit nga nasyon.
Raya hay kasunod it maeapnagong hub-eag protesta kasunod sa kinagamo nga nagapatunga sa nasyon it Israel ag mga militanteng Hamas.
Suno kay Bombo International Correspondent Jenelyn Bontipula, kampante sanda nga inde mag-intra ro gobyerno it Jordan sa inaway sa tunga it gobyerno it Israel kontra sa mga Hamas militants bangud nga hasta sa makaron hay uwa pa it ginpaguwa nga statement ro andang gobyerno.
Halo-halo eon suno kana ro mga tawo sa Jordan kon sa siin ro kaeabanan nga nagaprotesta hay ro mga Palestinian nga naga-engganyo pa sa Hamas nga pabaskugon ro andang pakikipagsukoe sa mga Israeli defense forces.
Haeos tanan suno kana nga mga Pinoy ag OFW’s sa lugar hay doble ro pagdahan ag uwa sanda nagapaeapit sa mga lugar kon siin masako ro mga protesta.
