KALIBO, Aklan–Ginkumpirma it sangka Aklanon nga presenteng nagatrabaho sa Moscow sa nasyong Russia nga eowas ag maayos ro andang kahimtangan kasunod it ginlunsar nga rebelyon it pribadong mercenary group nga Wagner ko nagtaliwan nga weekend.
Suno kay Bombo International Correspondent Eddylon Nadua it Russia nga nagapadayon ag normal ro andang sitwasyon ag pagtrabaho sa nasambit nga lugar kasunod it tensyon sa tunga it militar it Russia ag mga mercenaries.
Sa kamatuoran sigon hay ko nagtaliwan nga mga inadlaw eabi eon ko weekend hay naging grabe kahugot ro pagpatuman it seguridad it Russian military.
Gin-abisuhan sigon sanda it embahada it Pilipinas kamana man ro gobyerno it Russia nga likawang mag-adto sa mga matawo nga lugar partikular eon ro mga pagtieipon-tipon.
Naging masyado sigon sandang madahan eabi eon kun kinahangean nandang magguwa sa andang panimaeay para makalikaw sa pagpangsita it mga suldado.
Nasayuran nga kun natutueopangdan it mga suldado nga iba ro lahi it sangka indibidwal hay anda rayang ginasita.
Angot kara, natapos eon man sigon ro mini-rebellion nga ginlunsar it nasambit nga grupo rason nga balik eon sa normal ro sitwasyon sa Russia.
Sa pihak kara, nagapabiling bigilante sa gihapon ro mga awtoridad sa tunga it owa pa natatapos nga giyera sa tunga it Russia ag Ukraine.