Kalibo Aklan ————-Patas eamang ro naging reaksiyon it mga Pinoy sa Netherlands may kaangtanan sa desisyon it International Criminal Court (ICC) nga magapatigayon it imbestigasyon sa kampaniya kontra droga ukon “war on drugs” ni Pangueong Rodrigo Duterte.
Suno kay Bombo International Correspondent Esther Grace Falcutan it Gelderland, Netherlands nga mas manami nga ma-imbestigahan raya it ICC agud nga magguwa ro kamatuoran kamana man nga mapasabat kung sin-o man ro responsable engkasong may natabong kapalpakan.
Madumduman nga nauna eun nga gin-anunsiyo it ICC nga gin-aprubahan eun ro imbestigasyon sa Pilipinas angot sa kontrobersyal nga “war on drugs” ni Duterte, kung siin libo-libo ro namatay.
Aprubado man it andang pre-trial chamber ro hirit ni dating ICC prosecutor Fatou Bensouda nga busisiin ro madugong giyera kontra droga sa Pilipinas.
Magasentro ro imbestigasyon sa mga patayan umpisa Hulyo 2016, kat maging Pangueo si Duterte, hasta Marso 2019, kat kumalas ro Pilipinas sa Rome Statute nga nagtukod sa ICC.
Pagausisaon man it ICC ro mga patayan sa Davao City umpisa Nobyembre 2011 hasta Hunyo 2016, termino ni Duterte idto bilang Mayor ag Vice Mayor.
Suno sa ICC nga base sa mga natipon nanda testimonya ag ebidensya, may indikasyong “sistematiko” ag “maeawigan” ro pagpatay sa sangka populasyong sibilyan, ag puwedeng makabig nga “crimes against humanity.”
