KALIBO, Aklan–Ginakabig nga ‘very successful’ it lokal nga gobyerno ro kakatapos eamang nga selebrasyon it Kalibo Sr. Sto. Niño Ati-atihan Festival 2023.
Suno kay Kagawad Mark Sy, tagapaghambae ni Mayor Juris Bautista-Sucro nga madinaeag-on nga napatigayun ro tanan nga plano rason nga naging maayos ro daeagan it selebrasyon.
Partikular nga gintumod it opisyal ro owa paggutok it plaza matapos nga ginkalhit ro judging ag pagbag-o it ruta it sadsad.
Ginpabugae man kara ro manami nga feedback halin sa mga pumueoyo nga nakisadya sa sang dominggong okasyon.
Ginpasaeamatan man kara ro kooperasyon it tanan agud nga matapos it maayos ro kabilugan it selebrasyon.
Sa pihak nga parte, amat-amat eon nga nagpull-out ro pilang ka mga vendors sa gintukod nga flea market it LGU-Kalibo.
Ginaeauman nga haeos 80 porsyento kanda hay eubusan eon nga makahalin hin-aga it hapon.
Plano sigon it iba sa mga raya nga magdiretso sa banwa it Ibajay ag Altavas para magbaligya.
