KALIBO, Aklan–Bangud nga owa pa ro campaign period ukon tiempo it pagkampaya, indi pa pwedeng papanaugan it penalidad ro mga aspirante nga nagakabit it andang mga campaign poster ag iba pang election paraphernalia.
Raya ro ginklaru ni Commission on Election ukon Comelec-Aklan spokesman Crispin Raymund Gerardo.
Apang suno kana nga may naga-eksister nga laye nga bawae ro pagkabit it campaign materials sa mga puno.
Posible sigon nga magapangatubang sa kasong kriminal ro maga-eabag kara sa idaeum it Republic Act No. 3571.
Mag-eowas kara ro mga telecommunication companies ag ro aklan electric cooperative ukon akelco hay may kinamatarung nga magpamaeos it mga raya.
Kamana man nga may kinamatarung ro mga pribadong lugar kapareho it baeay ag mga building nga ibawae ro pagkabit it mga campaign poster nga owa it pahanugot sa tag-ana.
Samtang, ginpadumdum ni Gerardo nga kabay nga magpakita it mayad nga ehemplo ro mga local ag national aspirants.
Dapat man sigon nga magdahan ro mga nagapatigayon eon it house to house campaign bangud nga nagapabilin ro paeag it COVID-19.
Sa pihak nga parte, gindugang pa ni Gerardo nga nakatutok makaron ro mga staff it comelec sa mga trainings para sa nagahilapit nga eleksyon ag ro official nga listahan it mga kandidato.
Ginaeauman nga maipaguwa raya ko Disyembre 15 apang nadelay bangud sa resulta it raffle it partylists slots ag owa pa naresolba nga kaso it nuisance candidates.
