Kalibo Aklan ———Owa pa man natapos ro Enhanced Community Quarantine sa probinsiya it Aklan, apang nataeupangdan eon ro amat-amat nga pag-abu it mga saeakyan sa mga National Highway .
Raya hay nagatuga it mahaba nga pila sa mga border checkpoint bangud sa maid-id nga pag-usisa sa mga saeakyan nga nagasueod sa banwa it Kalibo .
Sa border control checkpoint sa Brgy Tigayon, Kalibo, mag-eowas sa mga dokumento nga gina-usisa eabi eon ro quarantine pass ag permit to travel sa mga delivery van, gina-check man ro body temperature it kada sakay it sangka saeakyan .
Kinahangean man nga mag-agi ro mga saeakyan maskin ro mga bisikleta sa disinfection shower pag-eampas it checkpoint sa nasambit nga lugar.
Kaibahan nga nagabantay sa lugar ro mga katapo it Kalibo PNP , Provincial Highway Patrol Group ag iba pang frontliners.
Instrikto sigon sanda sa mga nagapatigayon it transaksyon sa banwa it Kalibo , kun sa siin, ginapasugtan ro mga naga-agto sa bangko basta nga maga-aywan ro mga raya it valid ID, apang kon nagabakae it bueong hay ginapabalik nanda ag sa baylu hay ginapa-agto sa andang mga Barangay Officials.
