KALIBO, Aklan–Igadangop makaron nga adlaw it Huwebes kay Department of Environment and Natural Resources (DENR) Secretary Roy Cimatu ro mga nagapangunang problema it mga hotel ag resort owners sa pag-angkon it kaugalingon nga sewage treatment plant ukon poso negro.
Ko martes nga adlaw hay nagtapos ro daywang adlaw nga pueong nga ginpatawag it ahensiya agud nga ipaathag sa mga stakeholders ro kaungdan it bag-ong memorandum nga naga-obliga sa mga establisimento sa kilid it baybay nga makaangkon it sariling treament plant.
Suno kay Atty. Ramar Niel Pascua, chief legal officer it DENR-Environmental Managament Bureau Region 6, pila sa mga issues ag concerns nga ginpaabot it mga tag-ana it mga establisimentong maeapit sa white beach nga apektado it mandu hay kon siin nanda igapilak ro andang treated wastewater.
Sa idaeum it Memorandum Circular No. 2018-06, tanan nga mga resorts ag kaparehong establisimento nga may 50 nga kwarto ukon masobra pa nga maeapit sa bibi it baybay, umpisa sa Stations 1 hasta 3, hay dapat nga may sariling sewage treatment plant samtang ro mga may 49 nga kwarto panaba hay pwedeng pumili kon sarili ukon clustered treatment plant.
Ro iba pang establisimento sa ibang parte it isla nga may masobra sa 50 nga kwarto hay obligado man nga makaangkon it STP.
Nauna eon nga gin-insister ni Cimatu nga ro mga nakasunod eamang sa patakaran nga establisimento ro pagapasugtan nga uman nga maka-operate sa pagbukas it Boracay sa Oktubre.
