KALIBO, Aklan — Ginabawaean anay ro pagpasueod sa isla it Boracay ag bilog nga probinsya it Aklan it mga buhi nga baboy ag processed pork-products halin sa Mindanao nga makaron hay apektado man it African Swine Fever (ASF).
Nagpaguwa si Aklan Governor Florencio Miraflores it Memorandum Order No. 031 agud ipatuman ro hugot nga tikang agud nga maamligan ro babuyan ukon swine industry ag food security sa probinsya sa tunga it mga nailistang kaso it ASF sa Mindanao.
Ro pre-emptive banning hay nag-umpisa ko Pebrero 3, 2020.
Nailista ro kauna-unahang kaso it ASF sa Mindanao kapin eon sa Davao Occidental kon sa siin masobra sa 1,000 ka mga baboy ro nagpositibo sa ASF.
Nagapabilin mat-a nga ASF free ro bilog nga Visayas.
Bantay sarado makaron it mga otoridad ro mga paeoparan ag pantalan sa Aklan nga nagapatigayon it checkpoints ag quarantine inspections.
Sa pihak nga parte, nag-apela ro Office of the Provincial Veterinarian (OPVET) sa publiko nga inde anay magdaea it mga produktong sakop it ban.
