NATIONAL News — Nagpaandam ro Malacañang sa mga nagasoeose sa publiko para mag-alsa kontra sa gobyerno, partikular kay Pangueong Ferdinand `Bongbong’ Marcos Jr. nga may katapusan ro tanan ag posibleng magresulta pa raya sa kasong sedisyon.
Sa press briefing sa Malacañang, ginpahayag ni Palace Press Officer Atty. Claire Castro nga nagakabaeaka man ro Pangueo sa mga nagakatabu sa Davao City bangud sa haeos adlaw-adlaw nga hubeag protesta para i-insister nga ibalik sa Pilipinas si dating Pangueong Rodrigo Duterte.
Ginpahayag ni castro nga ro ginahinyu eamang it Malacañang hay sayuron anay it mga taga-Davao ro kamatuoran ag maging kalmado sa mga makarondaya nga paniempo.
Dapat sigon nga indi magpadaea sa mga saea nga impormasyon ukon fake news ro pumueuyu it Davao kapareho it napabalita nga pagasalakayon sigon ro baeay it dating pangueo nga ginpamalibaran it Philippine National Police.
Ginpahayag it opisyal nga ro pagpakalhit it fake news hay nagatuga it gulo sa isip it mga taga-Davao rason nga dapat nga maging mapagbantay ro publiko ag indi magpati sa mga saea nga impormasyon.
Gintumod ni Castro si Davao City Mayor Sebastian ‘Baste’ Duterte nga nagapakalhit it fake news bangud nga raya mismo ro ginasugid nga naghambae nga pagasalakayon ro andang baeay.
Ginpahayag pa kara nga bukon it balat-sibuyas si Pangueong Marcos apang nagpaandam nga may katapusan ro tanan.
