KALIBO, Aklan—Gin-relieve eun ro tatlong ka mga pulis nga imbolbado sa pagkamatay it sangka eaeaki nga nag-amok sa Sitio Libas, Barangay Alas-as, Madalag, Aklan.
Ginkilaea ro namatay nga si Alan Nabiong, 37-anyos, ag residente it nasambit nga lugar.
Sa interview it Bombo Radyo Kalibo kay P/Staff Sgt. Jane Vega, tagapaghambae it Aklan Police Provincial Office (APPO), ginpahayag kara nga ro nasambit nga tikang hay nakabase sa standard operation procedure it Philippine National Police (PNP).
Tuyo man it taeatapan nga mataw-an it proteksyon ro ginahimo nga imbestigasyon sa insidente.
Ginapabutyag dugang nga kinahang-ean indi makit-an sa lugar ro mga imbolbado samtang ginapatigayon ro imbestigasyon.
Magahoeat man suno pa kana it mando maghalin sa provincial headquarters ro mga gin-relieve para sa panibag-o nga assignment.
Madumduman nga napilitan nga magpaeupok it anang M16 Rifle si Police Master Sergeant Rufino Donato Jr., chief investigator it nasambit nga police station matapos ro gina-alegar nga pag-eagas kana ni Nabiong.
Kaibahan man sa mga rumesponde sa lugar sanday Police Chief Master Sergeant Blas Nahil ag Police Staff Sergeant Fidelino Ricablanca Jr.
