KALIBO, Aklan—Pangkabilugan nga naging malinong ro selebrasyon it bag-o eamang natapos nga Ati-Atihan festival 2023 nga kaparte it kapistahan ni Sr. Sto. Niño de Kalibo.
Raya hay matapos ro daywang dag-on nga pagpaiway it selebrasyon tuga it covid 19 pandemic.
Ginkumpirma ni Aklan Police Provincial director P/Col. Crisaleo Tolentino nga owa it anuman nga nailistang “untoward incidents” mag-eowas sa pilang insidente it kinagamo tuga it kahilungon.
Kadungan kara, ginpasaeamatan ni Tolentino ro tanan nga mga kapulisan it Aklan ag augmentation force halin sa Police Regional Office ukon PRO-6 ag iba pang kaibahan nga natungdan nga ahensiya it gobyerno eakip ro force multipliers rason nga naangkon ro zero major incident.
Sa pihak nga parte, ginpasidunggan it PNP ro mga kapulisan nga nagbuyot it importanteng papel sa sang domingo nga selebrasyon it Ati-Atihan festival nga nag-umpisa ko Enero 9 hasta 15.
Ro pasidungog hay gintau ni Col. Tolentino sa mga opisyal ag miyembro it ginbilog nga site task force ati fest matapos ro ginpatigayon nga send-off ceremony sa APPO headquarters.
Suno kana nga gusto kunta ni regional director P/Brig. Gen. Leo Francisco nga imaw mismo ro magapaabot it pagpasaeamat apang masako ro anang schedule.
