KALIBO, Aklan–Eubos nga nagakasadya ag nagahilinugyaw ro mga pumueoyo matapos nga piyerdihon it England ro koponan it Senegal sa score nga 3-0 sa round of 16 match nanda sa nagapadayun nga FIFA World Cup 2022 sa Qatar.
Ginpahayag ni Bombo International Correspondent Ramil Isogon it United Kingdom nga halin sa umpisa hay dominado it ranked number 5 ro hampang kontra sa ranked number 18 nga Senegal nga ginhiwat sa Al Bayt Stadium.
Unang nakalista it goal si Jordan Henderson sa sueod it 38 minutos ag antes matapos ro first half hay naipasueod ni Harry Kane ro goal.
Sa pag-umpisa it ikaywang half hay gintinguhaan pa it Senegal nga makaeagas hasta sa uman nga nakalista it goal si Bukayo Saka sa sueod it 57 minutos it hampang.
Owa eon ginpabay-an pa it England nga makalista it goal ro ka-engkwentro ag eubusan nga gin-ubos ro oras.
Ro England hay sueod eon sa quaterfinals kung siin makasambuwa nanda ro defending champion nga France sa Disyembre 11.
Ginapanan-aw man kara nga magiging makahawat-hawat ro masunod nga hampang it koponan eabi pa ag una ro presensya it world’s number 1 player nga si Kylian Mbappe it France.
