Una sa maayos nga sitwasyon makaron ro mga pumueuyo sa Israel kasunod it napabalitang pagbaeos it pag-atake it Iran.
Suno kay Melly Jean Norvilla, Bombo International News Correspondent sa Israel, sa idaeom gihapon sanda it emergency alert umpisa nga umatake ro Iran alas-3 it aga-aga, kahapon, adlaw it Byernes, Hunyo 13.
Naga-tinir eon lang sigon sanda sa andang mga gina-istaran, uwa it trabaho, ag uwa it klase.
Sa pihak it mga paeag it peligro sa andang kabuhi, uwa imaw naga-kabaeaka bangud haum ag gina-himo tanan it Isarel ro andang makaya para maprotektahan ro nasyon.
Dugang pa nana, nga tatlong beses nag emergency alert sa andang lugar halin kat mag-umpisa ro pag-atake it Iran.
Mageuwas sigon sa pag-atake it Iran, masami man sandang nakakabaton it pag-atake halin sa Lebanon, apang insigida rayang nasosolusyunan antes pa man umabot ag tumama sa eugta.
Pahayag pa ni Norvilla, sa makaron hay uwa pa it nakakaabot nga pag-atake sa andang lugar, apang may nababalitaan imaw nga may umabot eon sa may boarder it Israel.
Dugang pa nana nga antes pa man tumama ro mga pag-atake, gina-alerto eon sanda it andang gamit nga application sa andang mga cellphone para maka-adto sa mga safety rooms.
inpasiguro man nana sa mga pamilya it mga kapwa Pilipino nga euwas sanda ag uwa naga-pabaya ro Israel sa andang kahimtangan.
