Padayun ro kalbaryong ginaexperiensiyahan it pumueuyu bangud man sa epekto it pandemya nga ginsundan it iba pang problema sa ibang nasyon nga tinamaan man ro ekonomiya it pilipina.
Indi mapugngan ro pagtaas it presyo it petrolyo ag pagmahae it mga baeak-eon ag serbisyo.
Kun ro mga may trabaho hay nabudlayan eon nga makadungan, paalin pa ayhan ro mga naduea-an it obra nga hasta sa makaron hay nabudlayan nga maka usoy it paeangitan-an.
Mabahoe nga bulig ro ayuda halin sa gobyerno apang nasayuran naton nga bukon raya it pang mabuhayan , iba sa gihapon kon may kahigayunan nga makapagtrabaho.
Angot kara, sa maabot nga hunyo 12, araw ng kalayaan, naga-abot sa 88,677 nga trabaho ro tanyag sa job fair nga pagahiwaton it department of labor and employment ukon DOLE.
Sa nasambit nga numero, 80,627 ro local employment nga kaabuan hay sa manufacturing, business process outsourcing , construction ag logistics.
Kapin sa 8,050 man ro pwedeng aplayan sa overseas employment.
Sa bulaacan capitol gymnasium it malolos pagahiwaton ro main event apang may kanya-kanyang venue ro tanan nga rehiyon nga pwedeng makita sa website it DOLE bureau of local employment.
Nagaeaum kita nga maabu ro mataw-an it kahigayunan sa nasambit nga job fair.
Kon amat ro problema, maabu ro bakante apang sangkiri eang ro nababaton bangud sa pilang mga rason.
Nature eon sa atong mga pinoy ro pagiging mahugod, tampad ag madiskarte.
Maabu man ro owa nagapili it trabaho basta nga nagakita it mayad para sa pamilya.
Kabay nga ro masunod nga administrasyon hay mas mag focus sa trabaho.
Raya ro sambilog sa makabulig katon sa pandemya ag krisis.
Mas pa kunta nga mapabaskog ro mga training sa labor force.
Eabaw sa tanan, mas mataw-an it atensyon ro pagkinahangean it mga trabahante .
