Blangko ro sangka residente nga nakilaea kay Ignare Asiong kon siin naghalin ro kaeayo nga gintunaan it pagkasunog it anang baeay ag pagkadaeahig it 15 nga iba pa, Martes Santo it hapon sa Purok 2, Brgy. Tigayon, Kalibo.
Raya hay matapos nga ginaturo it mga saksi nga sa anang baeay naghalin ro kaeayo.
Suno kana nga nag-uli sanda it anang misis sa Brgy. Dalagsaan sa banwa it Libacao para sa lamay it anang igkampod kat matabu ro sunog rason nga owa it may nasalbar sanda nga mga gamit.
Ginpahayag dugang nga antes nga nagpanaw hay gin-double check nana nga owa it mga appliances nga nakasaksak.
Gulpi eamang sigon imaw nga nakabaton it tawag angot sa pagkasunog it andang mga baeay.
Nasayuran ro baeay ni Asiong hay nahamtang sa tunga nga portion.
Madali man nga nagkalhit ro kaeayo bangud nga mag-eowas nga masyadong mainit ro tiempo hay himo sa light materials ro tanan nga mga nadaeasa nga baeay.
Base sa report, 14 ro totally burned nga baeay ag daywa ro partially damaged.
Imbes nga magbakwit sa covered court hay ginpakamayad it mga apektadong residente nga magtukod it tolda sa nasunog nga lugar agud nga idtu temporaryong magkatueog samtang ro iba hay naki-istar sa andang mga igbata.
Angot kara, nagpanawagan si Gabriel Nervar it bulig partikular ro mga construction materials sa uman nga pagpatindog it andang baeay kamana man ro mga kitchen utensils.
Ginbatikos man nana ro ibang mga tawo nga samtang nagakatabu ro sunog hay may mga nagapanakaw man sa ibang mga gamit.
Sa makaron hay nagapadayun pa ro imbestigasyon it bureau of fire protection ukon BFP-kalibo sa insidente.
