KALIBO, Aklan—Samtang nagadugang ro mga inadlaw, mas nga nakabatyag it kalisod ro mga residente sa daywang sitio sa Barangay Bakhaw Norte, Kalibo matapos nga ginpaidaeum sa indefinite granular lockdown.
Suno kay Barangay Captain Maribeth Cual nga hasta sa makaron hay blangko sanda kon hasta hin-uno magabuhay ro lockdown sa Sitio Ilaya ag Libuton B.
Nagareklamo eon sigon ro mga residente bangud nga amat-amat eon nga nagaka-ubos ro andang supply nga pagkaon ag ro andang tinipon nga kwarta.
Madumduman nga nag-umpisa ro lockdown ko Biyernes nga adlaw, Setyembre 11 matapos nga makalista it positibong kaso it COVID-19 nga makabig nga kauna-unahan nga kaso it local transmission.
Nasayuran nga sangka laboratory encoder sa Aklan provincial hospital ro nagpositibo sa sakit ag natapnan kara ro 6 nga iba pang katrabaho nga medical frontliner.
Nagapabilin sa quarantine facility ag asymptomatic ro mga nagpositibo.
Samtang, gindugang pa ni kapitan Cual nga maayos ro sitwasyun ag ikamayad nga eawas it pamilya it nasambit nga encoder kamana man ro andang mga kasimaryo nga naka-isolate.
Gindugang pa kara nga ro andang mga barangay volunteer ro nagabakae it mga importanteng kagamitan para sa mga residente eabi eon ro andang pagkaon ag bahog it andang mga kasapatan.
Eubus man nga ginkasubo ni kapitan Cual ro sangka hitabu nga gina-alegar nga owa it ospital nga nagbaton sa sambilog sa andang residente nga gin-atake it sakit nga hapo nga ginsueang it ambulansiya.
Ginbalik sigon raya it uman sa andang baeay ag idtu lang nagpamayad.
Sa pihak nga parte, ginpasaeamatan man nana ro iba pang mga indibidwal ag grupo nga nagatau it bulig sa mga residenteng apektado it lockdown.
