KALIBO, Aklan–Ginareklamo it mga residente sa Barangay Mangan sa banwa it Banga ro pag-inabu it mga eangaw sa andang lugar bangud sa sangka poultry farm.
Suno kay Elsie Raco, sangka residente sa lugar nga makabig nga disturbo sa andang adlaw adlaw nga pagpangabuhi ro eangaw eabi eon kon sanda hay nagakaon.
Nagakabaeaka sigon sanda sa sakit nga posibleng magdapo kanda partikular sa andang mga unga.
Nasayuran sigon nanda nga maabu nga sakit ro daea it mga eangaw.
Panawagan nanda nga kabay nga maaksyunan raya it natungdan nga ahensiya it gobyerno.
Dugang pa ni Raco nga raya ro unang kahigayunan nga nakaexperiensiya sanda it sobra kaabu nga pag atake it eangaw , kun sa siin hasta makaron hay indi nanda matumod kon siin raya nagahalin.
Kapin sa sang domingo eon sigon ro andang pag-antus sa problema.
Bukon suno kana it bastante ro pag-spray nanda it alcohol bilang pangontra sa eangaw bangud nga uman nga nagabalik ro mga raya pagkataliwan it pilang inoras.
