KALIBO, Aklan—Halin sa 6,000, nagtaas eon sa masobra sa 22,200 ro numero it mga nagpa-rehistro nga residente as of march 30 halin sa 16 nga barangay sa banwa it Kalibo nga gustong magpabakuna kontra sa Coronavirus Disease 2019 ukon COVID-19.
Raya ro ginpahayag ni Vaccine Czar Rey Villaruel bilang pagpahaum sa pag-abot it kapin sa 16,200 nga Covid-19 vaccines nga gin order halin sa AstraZeneca.
Nauna kara, nagpatigayon ro lokal nga gobyerno it Kalibo it serye it mga dayalogo sa mga residente it banwa.
Raya hay ginpatigayon pinaagi sa kooperasyon it Municipal Health Office ag Municipal Social Welfare and Development Office ukon MSWDO.
Apang, suno kay Villaruel nga ro nasambit nga numero hay masyado pang maeayo sa andang target mabakunahan nga 70,000 to 80,000 nga mga pumueuyu agud nga maabot ro herd immunity.
NNagapadayun sigon ro andang distribution it mga forms sa mga interesadong makabaton it bakuna.
Gindugang pa kara nga ro basehan para sa vaccine rollout hay “first come first served basis” ukon pagataw-an it prayoridad ro mga nakapa-rehistro eon.
Mag-eowas sa registration, ro LGU-Kalibo hay nagbakae man it back-up generator set para sa cold storage facility sa sueod it Municipal Health Office.
Samtang, ginpasiguro man ni Villaruel nga 95 porsiyento eon sanda nga haum ag bakuna eon lang ro ginahueat.
Nasayuran nga sa maga-abot nga Sinovac vaccine nga donasyon it china nga gin taeana para sa provincial government, pagataw-an kara it 500 dose nga hueag ro LGU-Kalibo.
Prayoridad kara sa mga mabakunahan ro mga frontliners kapareho it mga BHERTs, BHW, BNS ag iba pa.
Nauna kara, nagpatigayon man sanda it simulation exercise para sa actual vaccination.
Sa pihak nga parte, matapos nga owa nakapasar ro aklan catholic college gym sa pag-validate it Department of Health bilang vaccination site, igasaylo eon lang raya sa gym it St. Gabriel College.
Raya hay mag-eowaas pa sa covered court it Pastrana Park.
Ro bakuna hay nakataeana pa eamang para sa mga residente it Kalibo ag bukon it kaibahan kara ro mga transients ag mga boarders.
