KALIBO, Aklan—Sa state of shock gihapon ro mga residente ag maskin ro gobyerno it New York matapos ro naexperiensiyahan nga grabeng pagbaha sa northeast states it amerika kaibahan ro New Jersey tuga it Hurricane Ida.
Suno kay Bombo International Correspondent Philip Roldan it Albany, New York ag tubong Aklan nga kauna-unahan sa kasaysayan it nasambit nga estado ro naexperiensiyahan nga owa it untat nga pag-uean nga nagresulta sa flashfloods kun sa siin ginsueod ro mga subway stations ag mga basements it mga baeay.
Sa makaron hay kapin sa 13 eon nga katawo ro napabalitang namatay tuga it nasambit nga kalamidad.
Ginbutang eon man sa state of emergency ro mga lugar kun sa siin may nailistang namatay bangud sa padayun nga pag-uean ag maeapnagon nga pagbaha.
Nasayuan nga ko domingo nga adlaw, oras sa Estados Unidos kat mag-landfall ro bagyo nga una sa category 4, daea ro kabaskog it hangin nga 150 milya kada oras nga ginakabig nga pinakamabaskog sa US mainland.
Owa sigon it nagakatabu nga major calamity sa New York rason nga owa nanda napahauman ro grabeng pagbaha.
Sa pihak nga parte, gindugang pa ni Roldan nga kaabuan sa mga ginatamaan makaron it covid 19 sa US hay mga inunga eabi eon sa pagpanaeasa it delta variant.
Haeos 80 porsiyento sigon it adult population sa new York hay fully vaccinated eon rason nga bukon eon it mandatory ro pagsuksok it face mask.
Gin-umpisahan eon man sigon ro pagbakuna makaron sa 12 anyos pataas nga mga pamatan-on.
