KALIBO, Aklan—Maabu nga mga residente sa Barangay Poblacion, Kalibo ro naapektuhan it maeapnagon nga pagbaha tuga it bagyong Paeng.
Raya ro ginpahayag ni Punong Barangay Neil Candelario it Poblacion, Kalibo sa ginpatigayon nga paglibot agud nga ma-assess ro kahalitan nga tuga it maeapnagon nga pagbaha.
Suno kana nga masobra sa 200 nga indibidwal ro nag-agto sa andang barangay hall nga temporaryong evacuation center samtang may iba nga idtu nagpabilin sa Kalibo pastrana park.
May pila suno kana nga nag-agto sa munisipyo ag sa ABL sports complex.
Ginpahayag dugang nga may pilang lugar ro nakaexperiensiya it hasta abaga nga tubi baha samtang may iba nga eampas tuhod eamang.
Apang sa andang pag-usisa hay mas maabu ro apektadong residente eabi eon sa may estaka sa C. Quimpo ag Rizal St. kamana man sa C Laserna, Oyo Torong, Bliss Site ag iba pa nga mga manaba nga lugar.
Kasunod it paghubas it baha, pila sa mga nagbakwit hay nag uli eon sa andang natungdan nga mga baeay.
Nasayuran nga nag-eapaw ro Aklan river tuga it naexperiensiyahan nga mabaskog nga pag-uean sa banwa it Libacao ag Madalag.
Indi pa nanda natumod ro ensaktong numero it mga baeay nga nasamad it baha kamana man ro mga pananum nga nahalitan.
Nagpanupod man sigon sanda it food packs apang ginkueang.
