Ginareklamo it mga residente it Purok 6, Brgy. Tigayon, Kalibo ro andang sitwasyon matapos nga ginabaha ro andang ugsaran ag mabuhay maghubas ro tubi eabi eon kon mabaskog ro pagbuhos it uean.
Suno kay Jonalen De Leon, masobra sa 20 nga kabaeayan ro apektado nga pilang dag-on eon nanda nga ginaantos ro kalisod kapin eon ro andang mga estudyante nga kinahang-ean pa mag-eosong sa tubi-baha bago makatabok sa karsada.
Dugang pa ni Dillon nga maskin ro andang pangabuhian eubusan eon nga naapektuhan bangud sa inde eon nanda makapananom it mga tinuean-on ag pasma ro ginaabot it mga residente halin sa andang trabaho partikular ro mga tricycle driver. Ginapatihan it mga raya nga uwa eon it maeapsan ro tubi-baha rason nga naga-stagnant raya sa andang ugsaran.
Sa pihak kara, ginklaro ni Punong Brgy. Gil Morandante, nga umpisa sa anang pagmanehar sa barangay hay gin-obrahan eon nanda it drainage paguwa sa Aklan river ro nasambit nga lugar. Apang, bangud sa pagbuhos it mga mabaskog nga pag-uean sa pagtaliwan it tyempo hay inde eon masarangan it drainage nga masubside ro tubi-baha bangud nga ro andang barangay hay catch basin it tubi maghalin sa ibabaw partikular sa Barangay Linabuan.
Sa makaron suno kana hay nagpangayo ro council it kapin sa P2 milyon pesos nga pondo sa Aklan provincial government agud nga masugpunan ro drainage nga andang gin-obra sa nasambit nga lugar agud nga maghubas eagi ro tubi-baha.
Ro Purok 6 suno kana hay manaba nga porsyon it barangay rason nga masami sanda nga ginabaha bangud nga kato pa man hay aeagyan eon raya it tubi-baha
