Kalibo Aklan————–Ginpahauman eon it mga residente sa Barangay Tambak, New Washington eabi eon ro mga naga-istar maeapit sa dagat ro pagtama it Bagyong Odette sa posibleng igatuga kara nga mabaskog nga hangin ag pagbaha.
Suno kay punong barangay Lucille Macario it nasambit nga lugar nga ko lunes pa eamang hay nagpatigayon imaw it emergency meeting ag insigida nga nag-bandilyo ukon naglibot ro anang mga council sectoral agud nga makapahaum ro mga residente.
Haeos tanan nga mga baeay hay ginpang ga-id ro andang mga bungbungan ag ginpintae it butong agud nga indi pag-euparon it hangin.
Nasayuran nga nakaangkon eon it leksyon ro mga akeanon sa pagpanaeasa kato it mga mabaskog nga bagyo kapareho it Frank, Yolanda ag ro pinaka-ulihi hay ro Ursula ko December 2019.
Samtang, nagpanawagan man si kapitan macario nga samtang may oras pa hay magpatigayon it voluntary evacuation eabi eon kon ro andang lugar hay delikado sa daluyong ukon storm surge .
Ro andang gintaeana sigon nga evacuation center hay ro tambak elementary school kun sa siin kaina bandang alas-6:30 it agahon hay may nagsaylo eon idtu.
Posible man sigon nga igamandu nana ro forced evacuation kon kinahangeanon.
