Mga residente sa sitio sa banwa it Lezo ag Numancia nga ginbutang sa lockdown, indi eon kinahang-ean nga ipaidaeom sa mass testing—PHO
KALIBO, Aklan—Indi eon kinahangean nga ipaidaeom sa mass testing ro mga residente sa Sitio sa banwa it Lezo ag Numancia nga nauna eon nga ginbutang sa Granular Enhanced Community Lockdown umpisa ko Disyembre 30, 2020.
Suno kay Dr. Cornelio Cuatchon jr it PHO-Aklan nga natigayon eon nga maboe-an it swab tests 34 nga mga ginakabig nga high risk contacts it mga nag-positibo sa sakit nga mga residente.
Ginkasugtan man sigon nanda it Local Inter-Agency Task Force it Lezo nga pagapatapuson eon lang ro 14 diyas nga lockdown sa pilang panimaeay sa Sitio Tunga, Barangay Ibao, Lezo eabi eon ro mga residente nga nakaangkon it positibong kaso samtang ro nabilin nga iba pang parte it sitio hay pagabuksan eon matapos ro pitong adlaw.
Ginpahayag dugang nga ro mga residente nga may sintomas it deadly virus hay iga-isolate ag igapaidaeum sa swab tests.
Madumduman nga ginpatuman ro lockdown sa 140 nga mga baeay sa Sitio Tunga sa Barangay Ibao Lezo, ag Sitio Ilaya, sa Barangay Aliputos sa Numancia matapos nga makalista it ap-at nga kumpirmadong kaso.
Nasayuran nga sangka eaeaking empleyado it Aerodome Rescue and Firefighting Unit it Kalibo International Airport ro unang nakaangkon it virus antes nga natapnan ro 3 miyembro it anang pamilya sa Lezo.
Samtang , ginlaygay ni dr cuatchon sa tanan nga owa pa natapos ro covid 19 rason nga dapat sa gihapon nga sundon ro mga minimum health protocols eabi eon ro pag obserna it physical distancing.
Sa pihak nga parte, ginpaathag kara nga maskin nga bukon it masyadong makamaeatay ro bag-ong variant it covid-19 nga nadiskubre sa united kingdom , apang madasig raya nga magtapon.
Padayun pa sigon ro pag estudyo kara it mga eksperto.
