LIBACAO, Aklan—Una eon sa eowas nga kondisyon ro mga sakay it baesa nga inanod sa kasagsagan it maeain nga panyempo sa Aklan River nga maghalin sa Brgy. Ortega sa banwa it Libacao.
Suno sa residente nga si Jorge Zorilla, natigayon nga narescue it Municipal Disaster Risk Reduction Management Office ukon MDRRMO Libacao ro pasyente nga ginsakay sa baesa kaibahan ro iba pang indibidwal matapos nga inanod it masueog nga tubi daea it pagbaha-baha sa Aklan river.
Ginpaathag ni Zorilla nga nabugto ro kaeat nga ginaguyod sa baesa rason nga inanod raya it tubi-baha.
Una kara, uwa it nagadesidir nga magtabok sa pihak nga suba bangud sa masueog nga tubi-baha apang kinahang-ean eon nga madaea sa banwa ro pasyente agud nga mabueong ro anang mga lastro daea it anang pagdanlog sa andang panimaeay rason nga ginhimuan it pamaagi it andang mismo nga kapitan hasta sa natabo ro nasambit nga insidente.
Mag-eowas sa insidente hay maabo pa ro nastranded sa lugar bangud sa uwa it nagadapit sa baesa sa kahadlok nga madisgrasya ro mga raya.
